الأربعاء، 29 أبريل 2009

كلمة لطارق الشيخ، كفي نفسك.. ودفي نفسك، وارحمنا

الفقر له ناسه.. وكما يشاع عن المصريين الآن... انهم فقر، لا اعرف حدود المسافة بين الفقير والفقري، لكننا حتى في وصف خفيف الظل، بنصفه بالفقري، في دلالة على أننا ناس فقر
الحقيقة احترمت العنوان ده جدا : حــصــريا .. طارق الشيخ (كفي نفسك) اغنيه حزنx حزن لطم للصبح
هو اللي حط العنوان فقري برضو، بس معاه حق، اغنية فقر، وغم، قرف، قرف ، قرف
يعني اللي بيحصل في الدنيا ده مش شوية، حتى الخنازير في المكسيك بقى بيجيلها انفلونزا

عايش مرتاح واديك شايف.. لتعبت بعدك ولا خايف.... لية ابقى برجوعك راضى
صدقنى مش بحرق دمك.. بالعكس دا انا شايل همك... وتعبنى تعبك على الفاضى

كفى نفسك انا عودت دموعى متمسحهاش الا ايديا كفى نفسك انا لو رحت فى حضنك يبقى اهون الموت عليها كفى نفسك انا عودت دموعى متمسحهاش الا ايديا كفى نفسك انا لو رحت فى حضنك يبقى اهون الموت عليها


يعني النفسنة والقرف ده بقى في الغنا كمان؟؟ بيقوله صدقني مش بحرق دمك، انا شايل همك، يعني كلام كله سماوي، وغلاوي
يعني اغنية دقيقة حداد النكد القديمة بتاعت طارق الشيخ كانت أرحم مافيهاش النفسنة والغل ده

متضعفش وماتتذلش.. علشان من نظرى ماتقلش.. ايامك مش هحنلها
ابعد بلاش تترجانى.. انا لو هضيع من احزانى... كلمة ومفيش غيرها هقولها
صدقنى مش بحرق دمك بالعكس دا انا شايل همك وتعبنى تعبك على الفاضى
كفى نفسك انا عودت دموعى متمسحهاش ال ايدية كفى نفسك انا لو رحت فى حضنك يبقى اهون الموت


يخرب بيت الفقر، الأغنية دي شغالة في كل توكتوك، وكل ميكروباص، يعني انا لو سواق وبسمعها كنت فجرت نفسي بالركاب في محطة اتوبيس
وبعدين أنا اول ما سمعتها افتكرته بيقول ... دفي نفسك، وقعدت اقول ايه دفي نفسك، ايه الراجل العجيب ده؟ على اساس انه الدفا عفا
والألبوم اسمه ايه؟؟ ندم عمرك، يا عم هي ناقصة أهلك

هناك 8 تعليقات:

عزة مغازى يقول...

لانك طيب جدا يا عبد الرحمن فانت متعرفش اكيد ان تفجير نفسك بالركاب فى محطة بنزين هيحقق خساير بشرية ومادية اكبر بكتير من تفجير نفسك بيهم فمحطة اتوبيس

لذا وجب التنويه

امضاء
مستشارك التخريبى
عزة الدقن

TAFATEFO يقول...

هو ايه علاقة الأغنية دي بالمزيكا التي لن تموت؟؟

عزة مغازى يقول...

يا طفاطيفو فيه قانون غير مكتوب فى المدونات
مفاده : عبد الرحمن يعمل اللى هو عايزه.... عبد الرحمن يكتب اللى هو عايزه

ثم انه مينفعش يطابق توقعات الجمهور طول الوقت

هذه المدونة ترفع شعار : فى صحة المفاجات

عزة مغازى يقول...

قلم جاف عذرا
اثناء قيامى بحذف تعليق لى امتلا بالاخطاء الطباعية فجاء غير مفهوم... قمت بحذف تعليقك الاول عن طريق الخطا

بالغ اسفى واعتذارى واتمنى ان تتفضل باعادة نشره

احمد سعيد يقول...

ههههههههههههههههههه
القلوب عند بعضها ياباشا
وبما اننا ميزانيين زى بعض
فحضرتك نفس الموضوع اللى انت اتكلمت عنه
لسه انا كاتب عليه بوست

انا برضه ماكنتش فاهم كلمات الاغنيه
كنت فاكرة بيقول :
انا اتعودت اشم صوابع رجليااااااا
:D

صباح النكد والقرف
انا حاسس انى فعلا هعمل عمليه انتحاريه ضد اول سواق الاقيه مشغل القرف دة

او ممكن اريح نفسى وافجر الموقف واجيب من الاخر

بوست هايل يامعلم

ونا سعيد بجد انى اتعرفت على المدونه دى
دى اول زيارة وان شاء الله لن تكون الاخيرة


تحياتى


( شكرا ياطفاطيفووووو)

احمد سعيد يقول...

اسسسسسسسسسف
انا قصدى شكرا ياميدو
لان هو اللى ادانى اللينك

مش عارف ليه بتلخبط بين ميدو ومصطفى

:)

قلم جاف يقول...

بمناسبة الغم .. من أشهر أغاني الأفراح في أوساط كثيرة في مصر أغنية "الدنيا خربانة .. يا عم خربانة"!

أكرر : أغنية بتتغنى في فرح .. مش في مجزرة!

وهو يعيد للذهن ما كتبته منذ عام تقريباً:

http://foorga.blogspot.com/2008/01/blog-post_10.html

mshmsha يقول...

الاغنيه دى نكد اوى
بس احلى حاجه اننا نلاقى معظم الميكروبصات مشغلين نفس الاغنيه
معرفش بيتفقوا مع بعض ولا ايه
ونلاقى نفسنا حفظناها من كتر ما سمعناها
واحلى حاجه اننا نحفظ كلام مش كلام الاغنيه اصلا
مهو كل واحد بيسمع على مزاجو بقى